വീണടത്തുനിന്ന് കുതിച്ച് ഓല; വിമർശനങ്ങൾക്കിടയിലും 150% വളർച്ചയുമായി ഇലക്ട്രിക് ഭീമൻസേവന മികവിനെക്കുറിച്ചുള്ള പരാതികളും വിപണിയിലെ തകർച്ചയും നേരിട്ട ഓല ഇലക്ട്രിക് അവിശ്വസനീയമായ തിരിച്ചുവരവ് നടത്തുന്നു. ചീത്തപ്പേരുകൾ വിട്ടൊഴിയാത്ത ഘട്ടത്തിലും കഴിഞ്ഞ മാർച്ചിൽ 150 ശതമാനത്തിലധികം രജിസ്ട്രേഷൻ വളർച്ച കൈവരിക്കാൻ കമ്പനിക്ക് സാധിച്ചു. ഈ ആവേശം നിലനിർത്താൻ തങ്ങളുടെ പ്രീമിയം ഫ്ലാഗ്ഷിപ്പ് മോട്ടോർസൈക്കിളിന്റെ വില വൻതോതിൽ കുറച്ചുകൊണ്ട് വിപണി പിടിക്കാനൊരുങ്ങുകയാണ് ഓല.
ഇന്ത്യൻ നിർമ്മിത 4680 ഭാരത് സെല്ലുകൾ റോഡ്സ്റ്റർ X പ്ലസിന്റെ (9.1 kWh) വില കുറയ്ക്കാൻ ഓലയെ സഹായിക്കുന്നു. വിദേശ രാജ്യങ്ങളെ ആശ്രയിക്കാതെ സ്വന്തം ഗിഗാഫാക്ടറിയിൽ ബാറ്ററി സെല്ലുകൾ ഉൽപ്പാദിപ്പിക്കാൻ തുടങ്ങിയതോടെ നിർമ്മാണച്ചെലവ് കുറഞ്ഞതാണ് ഈ വിലക്കുറവിന് പിന്നിലെ പ്രധാന സാങ്കേതിക നേട്ടം.
ഉൽപ്പാദന നേട്ടങ്ങൾ നേരിട്ട് ഉപഭോക്താക്കളിലേക്ക് എത്തിക്കുക എന്ന ലക്ഷ്യത്തോടെ ഓല ഇലക്ട്രിക് തങ്ങളുടെ മോട്ടോർസൈക്കിൾ നിരയിൽ വലിയ വിലക്കുറവ് പ്രഖ്യാപിച്ചു. 1,89,999 രൂപയുണ്ടായിരുന്ന റോഡ്സ്റ്റർ 9.1 kWh ഇവിയുടെ വില ഒറ്റയടിക്ക് 60,000 രൂപ കുറച്ച് 1,29,999 രൂപയാക്കി നിശ്ചയിച്ചു. ഇതോടൊപ്പം റോഡ്സ്റ്റർ X പ്ലസ് 9.1 kWh പതിപ്പിന്റെ വിൽപന രീതിയിലും മാറ്റമുണ്ട്. നിലവിലുണ്ടായിരുന്ന ഓപ്പൺ സെയിൽസ് രീതി അവസാനിപ്പിച്ച്, നിശ്ചിത സമയങ്ങളിൽ മാത്രം ലഭ്യമാകുന്ന ലിമിറ്റഡ് പർച്ചേസ് വിൻഡോ വഴി മാത്രമാകും ഇനി വിൽപന നടക്കുക.
ഇലക്ട്രിക് ബൈക്കുകളുടെ വിതരണം കൂടുതൽ കാര്യക്ഷമമാക്കുന്നതിനായി നിർദ്ദിഷ്ട സമയക്രമത്തിലും നിശ്ചിത യൂണിറ്റുകളിലുമായി വിൽപന പരിമിതപ്പെടുത്താൻ ഓല തീരുമാനിച്ചു. ഇതിന്റെ ഭാഗമായി, വില കുറഞ്ഞ റോഡ്സ്റ്റർ X പ്ലസ് 9.1 kWh ഇവിയുടെ ആദ്യ പർച്ചേസ് വിൻഡോ ഏപ്രിൽ 3 വെള്ളിയാഴ്ച്ച വൈകുന്നേരം 6 മണി മുതൽ രാത്രി 9 മണി വരെ ലഭ്യമാകും. വരും ദിവസങ്ങളിൽ വാഹനങ്ങളുടെ നിർമ്മാണ ലഭ്യത അനുസരിച്ച് തുടർന്നുള്ള വിൽപന വിൻഡോകൾ ഇടയ്ക്കിടെ പ്രഖ്യാപിക്കുമെന്ന് കമ്പനി ഔദ്യോഗികമായി അറിയിച്ചു.
ഒറ്റ ചാർജിൽ 500 കിലോമീറ്റർ റേഞ്ച് നൽകുന്ന ഓലയുടെ കരുത്തൻ മോഡലായ റോഡ്സ്റ്റർ 9.1 kWh പതിപ്പിന് വിപണിയിൽ അസാമാന്യമായ ഡിമാൻഡാണ് അനുഭവപ്പെടുന്നത്. നിലവിൽ കമ്പനിയുടെ വിതരണ ശേഷിയേക്കാൾ വളരെ കൂടുതലാണ് ഈ വാഹനത്തിനായുള്ള ആവശ്യക്കാർ. ഈ സാഹചര്യത്തിൽ വിതരണ ശൃംഖലയിലെ സമ്മർദ്ദം കുറയ്ക്കുന്നതിനും കൃത്യമായ ഡെലിവറി ഉറപ്പാക്കുന്നതിനുമായാണ് വിൽപന നിശ്ചിത സമയബന്ധിത സ്ലോട്ടുകളിലേക്കും പരിമിതമായ യൂണിറ്റുകളിലേക്കും മാറ്റാൻ കമ്പനി തീരുമാനിച്ചത്.
9.1kWh ബാറ്ററി പായ്ക്കുമായി എത്തുന്ന ഓല റോഡ്സ്റ്റർ X പ്ലസ് ഇലക്ട്രിക് ബൈക്ക് പ്രകടനക്ഷമതയിൽ പുതിയ മാനദണ്ഡങ്ങൾ നിശ്ചയിക്കുന്നു. സിംഗിൾ ചാർജിൽ 501 കിലോമീറ്റർ IDC റേഞ്ചും മണിക്കൂറിൽ 125 കിലോമീറ്റർ പരമാവധി വേഗതയും വാഗ്ദാനം ചെയ്യുന്ന ഈ വാഹനത്തിൽ 11kW മോട്ടോറാണ് ഉപയോഗിച്ചിരിക്കുന്നത്. വെറും 2.7 സെക്കൻഡിനുള്ളിൽ പൂജ്യത്തിൽ നിന്ന് 40 കിലോമീറ്റർ വേഗത കൈവരിക്കാൻ ഈ ബൈക്കിന് സാധിക്കുമെന്ന് കമ്പനി അവകാശപ്പെടുന്നു. സുരക്ഷയ്ക്കായി സിംഗിൾ-ചാനൽ എബിഎസിനൊപ്പം പേറ്റൻ്റ് സപ്പോർട്ടുള്ള അത്യാധുനിക ബ്രേക്ക്-ബൈ-വയർ സംവിധാനവും ഇതിൽ ഉൾപ്പെടുത്തിയിട്ടുണ്ട്.
അത്യാധുനികമായ ഡിസൈനും ഈടുനിൽക്കുന്ന സാങ്കേതികവിദ്യയും സമന്വയിപ്പിച്ചാണ് ഓല റോഡ്സ്റ്റർ X പ്ലസ് വിപണിയിലെത്തുന്നത്. വെള്ളത്തെയും പൊടിയെയും പ്രതിരോധിക്കാൻ ശേഷിയുള്ള IP67 റേറ്റിംഗോടു കൂടിയ ബാറ്ററി പാക്കാണ് ഈ വാഹനത്തിന്റെ പ്രധാന സവിശേഷത. ‘നേക്കഡ് സ്ട്രീറ്റ്ഫൈറ്റർ’ ശൈലിയിലുള്ള ഡിസൈൻ പിന്തുടരുന്ന ബൈക്കിൽ സ്ലിം ബോഡി പാനലുകളും ഫ്യൂച്ചറിസ്റ്റിക് സ്റ്റൈലിംഗുമാണ് നൽകിയിരിക്കുന്നത്. ഇന്റഗ്രേറ്റഡ് എൽഇഡി ഡിആർഎല്ലുകളോട് കൂടിയ സ്ലീക്ക് ഹെഡ്ലൈറ്റുകൾ, യാത്രക്കാർക്ക് സുഖകരമായ എർഗണോമിക് ഹാൻഡിൽബാർ, സിംഗിൾ പീസ് സീറ്റ്, കട്ടിയുള്ള ഗ്രാബ് ഹാൻഡിൽ എന്നിവ വാഹനത്തിന് പ്രീമിയം ലുക്ക് നൽകുന്നു.
