ഇന്ത്യയുടെ പുതിയ ‘സീക്രട്ട് ഇന്ധനം’; ലിറ്ററിന് 15 രൂപ മാത്രം, പെട്രോൾ വില കുറയ്ക്കാൻ ശേഷിയുള്ള കണ്ടുപിടിത്തം

ഇന്ത്യയിലെ പെട്രോൾ-ഡീസൽ വില പല നഗരങ്ങളിലും നൂറ് രൂപയോട് അടുത്താണ്. ഇന്ധന വില ഉയർന്നു നിൽക്കുന്നത് രാജ്യത്തെ സാധാരണക്കാരെയും, മധ്യവർഗത്തെയുമെല്ലാം ഒരു പോലെ ബാധിക്കുന്ന കാര്യമാണ്. ഇടയ്ക്ക് വിലക്കുറവുണ്ടായാൽ പോലും ആഗോള സാഹചര്യങ്ങൾ പ്രവചനാതീതമായതിനാൽ ഒരു പരിധിയിൽ താഴേക്ക് നിരക്കുകൾ കുറയാറില്ല. എന്നാൽ, ഒരു ലിറ്റർ പെട്രോൾ 15 രൂപയ്ക്ക് കിട്ടിയാലോ? അതെ, അത് സാധ്യമാണെന്ന് പറയുന്നത് മറ്റാരുമല്ല, കേന്ദ്ര പെട്രോളിയം മന്ത്രി നിതിൻ ഗഡ്കരിയാണ്.

കഴിഞ്ഞ ദിവസം രാജസ്ഥാനിൽ നടന്ന ഒരു റാലിയിലാണ് കേന്ദ്ര മന്ത്രി ഇതേപ്പറ്റി വിശദമാക്കിയത്. അത് എങ്ങനെ സാധിക്കുമെന്നായിരിക്കും ഇപ്പോൾ നിങ്ങൾ ചിന്തിക്കുന്നത്. അതിനുള്ള ‘മരുന്നാണ്’ എഥനോൾ. പെട്രോളിൽ എഥനോൾ കലർത്തിയുള്ള ഫ്ലെക്സ് ഫ്യുവലിലൂടെ പെട്രോൾ വില കുറയ്ക്കാൻ സാധിക്കുമെന്ന് ഗഡ്കരി പറഞ്ഞു. പെട്രോളിൽ 60% വരെ എഥനോൾ ബ്ലെൻഡ് ചെയ്താൽ വില ലിറ്ററിന് 15 രൂപ വരെ താഴ്ത്താൻ സാധിക്കുമെന്നാണ് അദ്ദേഹം വിശദീകരിച്ചത്. എഥനോളിന്റെ ആധിപത്യം, പരിസ്ഥിതിക്കും, കർഷകർക്കും ഒരുപോലെ മെച്ചമാണെന്ന ബോണസ് നേട്ടം കൂടിയുണ്ട്.

കഴിഞ്ഞ വർഷം കേന്ദ്ര മന്ത്രി നിതിൻ ഗഡ്കരി, ഫ്ലെക്സ് ഫ്യുവൽ വാഹനങ്ങൾ നിർമിക്കണമെന്ന് രാജ്യത്തെ വാഹന നിർമാണ കമ്പനികളോട് ആവശ്യപ്പെട്ടിരുന്നു. തുടർന്ന് ടൊയോട്ട നിർമിച്ച ലോകത്തിലെ ആദ്യത്തെ ഫ്ലെക്സ് ഫ്യുവൽ അധിഷ്ഠിത ഇന്നോവ കാർ അവതരിപ്പിച്ചു. ഇതോടെ ഫ്ലെക്സ് ഫ്യുവൽ ടെക്നോളജിയിൽ ഉയരങ്ങൾ കീഴടക്കിയ രാജ്യമാണ് ഇന്ത്യ എന്ന് വെളിപ്പെട്ടു. നിലവിൽ കൂടുതൽ എഥനോൾ ബ്ലെൻഡ് ചെയ്യുന്ന സങ്കേതങ്ങൾ ഇന്ത്യ വികസിപ്പിച്ചു കൊണ്ടിരിക്കുകയാണ്.

പുതിയ കാലത്തിന്റെ ഇന്ധനമായി E20 ഫ്യുവൽ മാറിക്കൊണ്ടിരിക്കുന്ന സാഹചര്യമാണ് നിലവിലേത്. BS6 രണ്ടാം ഘട്ടം നടപ്പാക്കാൻ ഒരുങ്ങുന്നതോടെ ഫ്ലെക്സ് ഫ്യുവലിന്റെ പ്രാധാന്യം വർധിക്കുന്നു. E20 ഫ്യുവലിൽ 20% എഥനോളാണ് ബ്ലെൻഡ് ചെയ്തിരിക്കുന്നത്. നിലവിൽ പെട്രോളിൽ 60% മുതൽ 85% വരെ എഥനോൾ (E85) ബ്ലെൻഡ് ചെയ്യാനുള്ള ശ്രമങ്ങളാണ് പുരോഗമിക്കുന്നത്.

കൂടുതൽ എഥനോൾ ബ്ലെൻഡ് ചെയ്ത ഫ്യുവൽ ഇന്ത്യയെ സംബന്ധിച്ച് ക്രൂഡ് ഓയിൽ ഇറക്കുമതി കുറയ്ക്കാൻ സഹായകമാകും. രാജ്യത്തിന്റെ ഇന്ധന ആവശ്യകതയുടെ 80 ശതമാനവും ഇറക്കുമതിയെയാണ് നിലവിൽ ആശ്രയിക്കുന്നത്. ക്രൂഡ് ഇറക്കുമതിച്ചിലവ് വൻതോതിൽ കുറയുന്നത് രാജ്യത്തിന്റെ സമ്പദ് വ്യവസ്ഥയ്ക്കും നേട്ടമാകുമെന്ന് വിലയിരുത്തപ്പെടുന്നു. ഇന്ത്യയിലെ വിലക്കയറ്റത്തോത് വലിയ തോതിൽ കുറയ്ക്കാൻ എഥനോളിലൂടെ സാധിക്കുമെന്നാണ് വിലയിരുത്തപ്പെടുന്നത്.

എഥനോൾ ഇന്ധനം രാജ്യത്തെ കർഷകർക്ക് വലിയ നേട്ടം നൽകുമെന്ന് നിതിൻ ഗഡ്കരി പറഞ്ഞു. ‘ആഹാരം നൽകുന്നവർ’ എന്ന ലേബലിൽ നിന്ന് ‘ഊർജ്ജം പ്രദാനം ചെയ്യുന്നവർ’ എന്ന നിലയിലേക്കാണ് കർഷകർക്ക് മാറ്റം സംഭവിക്കുകയെന്നും അദ്ദേഹം പറഞ്ഞു. ഇതാദ്യമായല്ല നിതിൻ ഗഡ്കരി വൈറലാകുന്ന ഇത്തരം പ്രഖ്യാപനങ്ങൾ നടത്തുന്നത്. മുമ്പ്, അടുത്ത അഞ്ച് വർഷത്തിനുള്ളിൽ പെട്രോൾ ഉപയോഗം അവസാനിക്കുമെന്നും, ഗ്രീൻ ഹൈഡ്രജൻ ആ സ്ഥാനം കയ്യടക്കുമെന്നും അദ്ദേഹം പറഞ്ഞിരുന്നു.

രാജ്യാന്തര തലത്തിൽ ഇന്ധന വില നഷ്ടത്തിലാണ് വാരാന്ത്യത്തിൽ ക്ലോസിങ് നടത്തിയിരിക്കുന്നത്. ബ്രെന്റ് ക്രൂ‍ഡ് ബാരലിന് 1.05% താഴ്ന്ന് 68 ഡോളർ എന്നതാണ് നിരക്ക്.