കൈവിട്ടു പോയ ജിയോസ്റ്റാർ ഡൊമെയ്ൻ തിരിച്ചു പിടിച്ച് റിലയൻസ്; ‘ബ്രാൻഡ് കൺഫ്യൂഷൻ’ ഒഴിവാക്കുന്ന നീക്കം

ഏറെ ചർച്ച ചെയ്യപ്പെട്ട ജിയോ ഹോട്സ്റ്റാർ ഡൊമെയ്ൻ സ്വന്തമാക്കി റിലയൻസ്. റിലയൻസിന്റെ വയാകോം 18 മീഡിയ പ്രൈവറ്റ് ലിമിറ്റഡും, ഡിസ്നി ഹോട്സ്റ്റാറും തമ്മിലുള്ള ലയത്തിനിടെയാണ് ഈ ഡൊമെ‍യൻ ഡൽഹിയിലെ ഒരു ടെക്കി സ്വന്തമാക്കിയിരുന്നത്. പിന്നീട് ഇത് ദുബായിലെ സഹോദരങ്ങളുടെ പക്കലെത്തി. എന്നാൽ ഇതിന് പകരം കമ്പനി ജിയോസ്റ്റാർ.കോം എന്ന വെബ്സൈറ്റ് ലോഞ്ച് ചെയ്തിരുന്നു.

ഇപ്പോൾ ബ്രാൻഡ് ബിസിനസുമായി ബന്ധപ്പെട്ട കാര്യങ്ങൾ പരിഗണിച്ചാണ് റിലയൻസ് ഈ ഡൊമെയ്ൻ നേടിയെടുത്തതെന്നാണ് സൂചന. കമ്പനി ഈ വിഷയത്തിൽ ഔദ്യോഗിക പ്രതികരണമൊന്നും നടത്തിയിട്ടില്ലെങ്കിലും, WHOIS റെക്കോർഡുകളിൽ ഇത് റിലയൻസ് സ്വന്തമാക്കിയതായിട്ടാണ് സൂചനകൾ. ഇത് പ്രകാരം മുകേഷ് അംബാനി നേതൃത്ത്വം നൽകുന്ന വയാകോം 18 മീഡിയയ്ക്കാണ് ഈ ഡൊമെയ്നിന്റെ അവകാശം.

മാസങ്ങൾ നീണ്ട് ചർച്ചകൾക്കും, നിയമപരമായ തർക്കങ്ങൾക്കുമാണ് ഇതോടെ വിരാമമാകുന്നത്. രണ്ട് വലിയ ബ്രാൻഡുകളായ റിലയൻസ് ജിയോ, ഡിസ്നി + ഹോട്സ്റ്റാർ എന്നീ ബ്രാൻഡുകൾ ചേരുന്ന ഡൊമെയ്ൻ, ഡൽഹിക്കാരനായ ഒരു ടെക്കിയാണ് ആദ്യം സ്വന്തമാക്കിയത്. തന്റെ പഠനത്തിനായി ഒരു കോടി രൂപയാണ് ഇദ്ദേഹം റിലയൻസിനോട് ആവശ്യപ്പെട്ടിരുന്നത്.

റിലയൻസ്, വയോകോം 18 എന്നീ കമ്പനികൾക്ക് ഡൊമെയ്ൻ നൽകാമെന്നും തന്റെ കേബ്രിഡ്ജിലെ പഠനത്തിന് ആവശ്യമായ തുക നൽകണമെന്നും ഇദ്ദേഹം ആവശ്യപ്പെട്ടിരുന്നതായിട്ടാണ് റിപ്പോർട്ടുകൾ. എന്നാൽ നിയമപരമായ സമ്മർദ്ദം ഏറിയപ്പോൾ ഇത് ഉപേക്ഷിക്കാൻ ഇദ്ദേഹം നിർബന്ധിതനായെന്നാണ് റിപ്പോർട്ടുകൽ. പിന്നീട് ഇത് ദുബായിലെ രണ്ട് സഹോദരങ്ങളുടെ കൈവശമെത്തി.

റിലയൻസിന്റെ, രാജ്യത്തെ ഡിജിറ്റൽ, സ്ട്രീമിങ് മേഖലയിലെ നിർണായക നീക്കമായിരുന്നു ഹോട്സ്റ്റാറിന്റെ ഏറ്റെടുക്കൽ. ജിയോ സിനിമയുമായി സഹകരിച്ച് ഒ.ടി.ടി പ്ലാറ്റ്ഫോമിൽ മേധാവിത്തം നേടാനാണ് കമ്പനി ശ്രമിച്ചത്. ഉയർന്ന വിസിബിലിറ്റിയുള്ള jiohotstar.com എന്ന ഡൊമെയ്ൻ നിയന്ത്രണത്തിലുള്ളത് ബ്രാൻഡ് സംബന്ധിച്ച ആശയക്കുഴപ്പം ഒഴിവാക്കാനും, കമ്പനിയുടെ മാർക്കറ്റ് പൊസിഷൻ ശക്തിപ്പെടുത്താനും സഹായിക്കുമെന്നാണ് വിലയിരുത്തൽ.

അതേ സമയം സ്വന്തം ഡൊമെയ്നായ jiostar.com അവതരിപ്പിച്ച സ്ഥിതിക്ക് ഇതിൽ ഏതാണ് കമ്പനി ഉപയോഗിക്കുക എന്ന് വ്യക്തമല്ല. jiohotstar.com എന്ന, കമ്പനി നേടിയെടുത്ത ഡൊമെയ്ൻ വയാകോമിന്റെ ഡിജിറ്റൽ സംരംഭങ്ങളുടെ ഭാഗമാക്കാനാണ് സാധ്യത കൂടുതൽ. ഈ ഡൊമെയ്ൻ എങ്ങനെയാണ് ഉപയോഗിക്കാൻ പോകുന്നത് എന്നത് സംബന്ധിച്ച് ഔദ്യോഗിക പ്രഖ്യാപനങ്ങളൊന്നും കമ്പനി നടത്തിയിട്ടില്ല.